ان سے امید التفات کہاں

ان سے امید التفات کہاں

میری تقدیر میں یہ بات کہاں

کیا خبر بے خودی کے عالم میں

لٹ گئی دل کی کائنات کہاں

تو نوازے ترا کرم ورنہ

میں کہاں اور تیری ذات کہاں

دل کو اپنا لیا ترے غم نے

اب غم دل سے ہو نجات کہاں

تیری خاطر تجھے بھی چھوڑ دیا

جیت کر ہم نے کھائی مات کہاں

تم نہ سمجھو گے ماجرا دل کا

تم کہاں دل کی واردات کہاں

لاکھ سورج تراشتے جاؤ

ختم ہوتی ہے غم کی رات کہاں

ان کے آنے کا انتظار طفیل

اس قدر فرصت حیات کہاں