مجھ سے برگشتہ جو تو اے گل بدن ہو جائے گا

مجھ سے برگشتہ جو تو اے گل بدن ہو جائے گا

میری نظروں میں جہاں اجڑا وطن ہو جائے گا

داغ ہائے دل اگر میرے بہاروں پر رہے

ایک دن سینہ میرا رشک چمن ہو جائے گا

مجھ کو دیوانہ سمجھ کر آپ چھیڑیں گے ضرور

میرے مطلب کا مرا دیوانہ پن ہو جائے گا

ہائے اتنا بھی نہ آیا عشق لیلیٰ کو خیال

اس جنوں میں قیس آوارہ وطن ہو جائے گا

اے خیالی دیکھنے ہی کی ہے یہ سب کچھ بہار

ایک دن برباد ہستی کا چمن ہو جائے گا