ہو اک نظر ادھر بھی او آن بان والے

ہو اک نظر ادھر بھی او آن بان والے

اک تیر پھینکتا جا بانگی کمان والے

میں خط تو تجھ کو بھیجوں او آسمان والے

لیکن کہاں کبوتر اونچی اڑان والے

کعبے میں تجھ کو ڈھونڈوں یا بت کدہ کے اندر

کچھ تو نشاں بتا دے او بے نشان والے

میں کس سے جا کے پوچھوں تحقیق حال تیرا

چپ ہیں یقین والے گم ہیں گمان والے

اک میری ہی دعا پر کیا پڑ گئے ہیں پتھر

تو سب کی سن رہا ہے او آسمان والے

کعبے کے جانے والے کعبہ کو جا رہے ہیں

تو ہی ادھر کو آ جا کعبہ بنانے والے