کھل جاتا ہے کیوں غنچہ صفت دل تہ خنجر

کھل جاتا ہے کیوں غنچہ صفت دل تہ خنجر

ٹوٹے ہیں مزے دید کے قاتل تہ خنجر

جینے کا مزا آ گیا مرنے میں ستم گر

جب سینہ پہ بیٹھا تو مرے قتل کو ہنس کر

تھا جلوہ نمائش نظر روئے منور

مقصد مرے دل کا ہوا حاصل تہ خنجر

کچھ تجھ کو خبر بھی ہے کہ تو گرم غضب تھا

تڑپا نہ ذرا صورت بسمل تہ خنجر

قاتل کی سبھی ختم ہوئیں مجھ پہ جفائیں

میں سمجھا جفاؤں کو ستم کی ہیں ادائیں

موقع جو ملا خوب لیں قاتل کی بلائیں

میں کام سے اپنے نہ تھا غافل تہ خنجر

دل درد سے جب تنگ تھا آنکھوں میں بھی نم تھا

دم تن میں نہ تھا کہیے کہ ہر وقت کا غم تھا

تقدیر میں لکھا ہوا سر ہونا قلم تھا

آساں ہوئی صبر کی مشکل تہ خنجر