kisi mast-e-naz ka hai abas intizar so ja

kisī mast-e-nāz kā hai 'abas intizār so jā

ki guzar ga.ī shab aadhī dil-e-be-qarār so jā

ye nasīm-e-ThanDī-ThanDī ye havā ke sard jhoñke

tujhe de rahī haiñ lorī mire ġham-gusār so jā

ye tirī sadā-o-nāla mujhe muttahim na kar de

mire parda-dār so jā mire rāzdār so jā

mujhe ḳhuuñ rulā rahā hai tirā dam-ba-dam taḌapnā

tire ġham meñ aah kab se maiñ huuñ ashk-bār so jā

na taḌap zamīñ pe zālim tujhe god meñ uThā luuñ

tujhe siina se lagā luuñ tujhe kar luuñ pyaar so jā

tujhe jin kā hai tasavvur ai mast-e-jām-e-ulfat

un hī añkhḌiyoñ ke sadqe mire bāda-ḳhvār so jā

tujhe pahlā sābiqa hai shab-e-ġham burī balā hai

kahīñ mar miTe na zālim dil-e-be-qarār so jā

kisi mast-e-naz ka hai 'abas intizar so ja

ki guzar gai shab aadhi dil-e-be-qarar so ja

ye nasim-e-ThanDi-ThanDi ye hawa ke sard jhonke

tujhe de rahi hain lori mere gham-gusar so ja

ye teri sada-o-nala mujhe muttahim na kar de

mere parda-dar so ja mere raazdar so ja

mujhe KHun rula raha hai tera dam-ba-dam taDapna

tere gham mein aah kab se main hun ashk-bar so ja

na taDap zamin pe zalim tujhe god mein uTha lun

tujhe sina se laga lun tujhe kar lun pyar so ja

tujhe jin ka hai tasawwur ai mast-e-jam-e-ulfat

un hi ankhDiyon ke sadqe mere baada-KHwar so ja

tujhe pahla sabiqa hai shab-e-gham buri bala hai

kahin mar miTe na zalim dil-e-be-qarar so ja