کسی مستِ ناز کا ہے عبث انتظار سو جا

کسی مستِ ناز کا ہے عبث انتظار سو جا

کہ گزر گئی شب آدھی دلِ بے قرار سو جا

یہ نسیم ٹھنڈی ٹھنڈی یہ ہوا کے سرد جھوکے

تجھے دے رہی ہیں لوری مرے غم گسار سو جا

یہ تری صدا و نالہ مجھے متہم نہ کر دے

مرے پردہ دار سو جا مرے رازدار سو جا

مجھے خون رولا رہا ہے ترا دم بدم تڑپنا

ترے غم میں آہ کب سے میں ہوں اشک بار سو جا

نہ تڑپ زمیں پہ ظالم تجھے گود میں اٹھا لوں

تجھے سینہ سے لگا لوں تجھے کر لوں پیار سو جا

تجھے جن کا ہے تصور اے مستِ جام الفت

ان ہی انکھڑیوں کے صدقے مرے بادہ خوار سو جا

تجھے پہلا سابقہ ہے شبِ غم بری بلا ہے

کہیں مر مٹے نہ ظالم دلِ بے قرار سو جا