ما سوائے عمر دو روزہ یہاں کچھ بھی نہیں
ما سوائے عمر دو روزہ یہاں کچھ بھی نہیں
یہ تزک یہ ساز و ساماں مہرباں کچھ بھی نہیں
کیسے کیسے نام آور ہو گیے غرق فنا
نام ہی باقی ہیں ان کے اور نشاں کچھ بھی نہیں
ہے یہ دنیا چند روزہ زندگی مثل حباب
کس گماں میں ہیں یہاں پیر و جواں کچھ بھی نہیں
مل گئے جمشید و کیکاوس دارا خاک میں
وہ جلالت وہ حشم وہ عز و شاں کچھ بھی نہیں
عالم اسباب سے حاصل نہیں کچھ جز کفن
مال و زر میں حصۂ اہل جہاں کچھ بھی نہیں
پل جھپکنے میں فنا ہوں گے زمین و آسماں
ایک دن اے غافلو ہوگا یہاں کچھ بھی نہیں
شوکت و شان و شکوہ و حشمت و عز و وقار
زندگی تک ہیں یہ سب پھر مہرباں کچھ بھی نہیں
ہے تو نازاں چند روزہ زندگانی پر عبث
ہو فنا جس کو ظہورؔ اس پر گماں کچھ بھی نہیں
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
