خالی ہو جو صراحی کھنکتی ضرور ہے

خالی ہو جو صراحی کھنکتی ضرور ہے

کم ظرف کی شراب چھلکتی ضرور ہے

اچھا سمجھ رہے وہ بیمار غم کا حال

بجھنے سے پہلے شمع بھڑکتی ضرور ہے

گیسو میں اپنے رخ کو چھپانے سے فائدہ

بجلی جو بادلوں میں چمکتی ضرور ہے

بسمل کی آنکھ صورت قاتل کو ایک بار

حسرت سے قتل گاہ میں تکتی ضرور ہے

دریا کی موجیں جب بھی ڈبوتی ہے کوئی ناؤ

ساحل پہ اپنے سر کو پٹکتی ضرور ہے

گلشن میں ہو ہی جاتی ہے گلچی کو بھی خبر

کھلتی ہے جب کلی تو مہکتی ضرور ہے

اب مانیں یا نہ مانیں یہ مرضی ہے آپ کی

فرحتؔ کی بات دل میں کھٹکتی ضرور ہے