میں پردہ ہوں تو تیرا راز آشکار نہیں

میں پردہ ہوں تو تیرا راز آشکار نہیں

جو پردہ در ہوں تو پھر کوئی پردہ دار نہیں

کوئی بھی دیکھنے والوں میں ہوشیار نہیں

نگاہ ایک ہے جلووں کا کچھ شمار نہیں

یہ کہہ کے مجھ کو لیے جا رہا ہے شوق وجود

کہ آج سر نہیں یا آستان یار نہیں

گھٹا ہے برق ہے ساقی ہے مے ہے یار نہیں

بہار تو ہے مگر حاصل بہار نہیں

کبھی خیال کی حد میں تھا یار کا جلوہ

کہ اب ہے جلوہ ہی جلوہ خیال یار نہیں

وہ کوہ طور ہو یا سرزمین دل بیدمؔ

جمال یار سے خالی کوئی دیار نہیں