ہمیں ان سے انہیں غیروں سے الفت ہونے والی ہے

ہمیں ان سے انہیں غیروں سے الفت ہونے والی ہے

ہماری اور ان کی ایک حالت ہونے والی ہے

مثال صبح کچھ فق فق ہے شام وصل کا چہرہ

یہ آمد ہی سے ظاہر ہے کہ رخصت ہونے والی ہے

اٹھو رندو چلو جلدی سے مے خانے میں سب مل کر

سنا ہے شیخ جی کی آج دعوت ہونے والی ہے

ابھرنے والی سب چیزیں ابھر آئیں گی اے ظالم

جوانی آنے والی ہے قیامت ہونے والی ہے

وہ میرے دیدہ و دل دیکھ کر کہتے ہیں محشر میں

انہی جھوٹے گواہوں کی شہادت ہونے والی ہے