نہ بوسہ دینا آتا ہے نہ دل بہلانا آتا ہے

نہ بوسہ دینا آتا ہے نہ دل بہلانا آتا ہے

تجھے تو او بت کافر فقط ترسانا آتا ہے

جو تم ہنسنے میں ہو مشاق ہم رونے میں کامل ہیں

تمہیں بجلی گرانا ہم کو مینہ برسانا آتا ہے

بچھا کر دام گیسو رخ پہ وہ صیاد یوں بولا

یہ پھندا وہ ہے جس میں مرغ دل بے دانہ آتا ہے

صراحی قہقہہ بھرتی ہے مینا مسکراتا ہے

ہمارا یار جس دم جانب مے خانہ آتا ہے

تبسم کی جگہ اس کافر بدکیش کو اے رندؔ

خفا ہونا بگڑنا مارنا دھمکانا آتا ہے