وہ دیتے ہیں ہر اک کو گالیاں آہستہ آہستہ

وہ دیتے ہیں ہر اک کو گالیاں آہستہ آہستہ

کچھ اب بڑھتی چلی ان کی زباں آہستہ آہستہ

مزہ مل جائے کشتے کو تمہارے دستِ نازک سے

مری گردن پہ ہو خنجر رواں آہستہ آہستہ

شبِ وصلت ہے آخر میں نہ رہ جاؤں کہیں محرم

مؤذن دیجیو للہ اذاں آہستہ آہستہ

ہزاروں دل بچھے ہیں آپ کے چلنے کے رستے میں

قدم رکھنا ذرا اے جانِ جاں آہستہ آہستہ

ابھی کم سن ہیں وہ فضلِ خدا سے جب جواں ہوں گے

بڑھیں گی اور اس سے شوخیاں آہستہ آہستہ

ہتھیلی میں سر اپنا لے کے چلئے بہرِ استقبال

وہ آتے ہیں ہلالؔ ابر و کماں آہستہ آہستہ