پلا کر جام وحدت کا مجھے مستانہ تو کر دے

پلا کر جام وحدت کا مجھے مستانہ تو کر دے

مرا آباد اے مرشد دل ویرانہ تو کر دے

مئے الفت سے اے ساقی مرا پیمانہ تو بھر دے

انا الحق کی صدا نکلے اگر مستانہ تو کر دے

پلا دے مجھ کو اے ساقی کرم سے بادۂ گل رنگ

خدا را بزم عالم سے مجھے بیگانہ تو کر دے

جو الفت دے تو ایسی دے توجہ دے تو ایسی دے

شمع بن بیٹھ محفل میں مجھے پروانہ تو کر دے

حباب بحر میں جو ہوں تو تو دریائے رحمت سے

الٰہی اپنی الفت میں مجھے دیوانہ تو کر دے

فنا ہو کر بقا پاؤں میں تیرے عشق و الفت میں

یہ میری خاک کو اے کوزہ گر پیمانہ تو کر دے

الٰہی ابرؔ کی قسمت ہمیشہ وصل مرشد ہو

صدف میں بحر وحدت کے مجھے دردانہ تو کر دے