عشق کا رنگ ترے دل پہ جما لوں تو کہوں

عشق کا رنگ ترے دل پہ جما لوں تو کہوں

وصل کا کوئی وسیلہ بھی میں پا لوں تو کہوں

جو مزا دل کو ملا ہے وہ نہ پوچھ اے قاتل

زخم شمشیرا ابھی اور میں کھالوں تو کہوں

داستان ہجر کی تم وصل میں گر پوچھتے ہو

اشک خوں آنکھوں سے اے یار بہاؤں تو کہوں

پوچھتے آپ ہیں جو درد جدائی مجھ سے

پہلے سینہ سے تمہیں اپنی لگا لوں تو کہوں

ہائے وہ سوتے ہیں اور وصل کی شب جاتی ہے

دم ذرا لے دل بے تاب جگا لوں تو کہوں

ہائے کیا پوچھتے ہو سوز غم فرقت کو

آگ بھڑکی ہے کلیجہ میں بجھا لوں تو کہوں

وعدۂ وصل پہ کہتے ہیں وہ ہنس کر دولہا

آئینہ دیکھ کے زلفوں کو بنا لوں تو کہوں