ai jaan meri aankhon par ye bar-e-nazari kyun hai

ai jaan merī āñkhoñ par ye bār-e-nazarī kyuuñ hai

tum baam pe aa.e ho ye jalva garī kyuuñ hai

jis ne tumheñ dekhā hai hosh us ke bajā kab haiñ

chitvan tirī o zālim jaada se bharī kyuuñ hai

asrār nahufta kā kuchh bhed nahīñ khultā

ye āh-e-shab-e-furqat hasrat se bharī kyuuñ hai

pūchhā na kabhī tū ne hāl-e-shab-e-tanhā.ī

o kāfir-e-dīñ mujh se ye be-ḳhabarī kyuuñ hai

ai chasm-e-shab-e-ġham-bīñ kuchh sabr bhī lāzim lāzim

tūfān bapā hogā ye nauha girī kyuuñ hai

maiñ dhyān meñ kis but ke bhūlā huuñ do-’ālam ko

dil mahv-e-tamāshā hai ye dard-sarī kyuuñ hai

ai jaan meri aankhon par ye bar-e-nazari kyun hai

tum baam pe aae ho ye jalwa gari kyun hai

jis ne tumhein dekha hai hosh us ke baja kab hain

chitwan teri o zalim jada se bhari kyun hai

asrar nahufta ka kuchh bhed nahin khulta

ye aah-e-shab-e-furqat hasrat se bhari kyun hai

puchha na kabhi tu ne haal-e-shab-e-tanhai

o kafir-e-din mujh se ye be-KHabari kyun hai

ai chasm-e-shab-e-gham-bin kuchh sabr bhi lāzim lāzim

tufan bapa hoga ye nauha giri kyun hai

main dhyan mein kis but ke bhula hun do-’alam ko

dil mahw-e-tamasha hai ye dard-sari kyun hai