falak nairangiyan hum KHaksaron ko dikhata hai

falak nairañgiyāñ ham ḳhāksāroñ ko dikhātā hai

tamannā kah rahī hai yaar se nāhaq chhuḌātā hai

zabāñ se kuchh shikāyat ho to lutf-e-'ishq jaatā hai

agar zabt-e-fuġhāñ kiije kaleja muñh ko aatā hai

kisī mahbūb kī zulf-e-musalsal ko na dekheñge

hamārā dil qasam is par tumhāre sar kī khātā hai

mirī fariyād sun kar chauñk uTThā yaar sote se

kahā dekho ye dīvāna yahāñ kyuuñ ġhul machātā hai

sanobar ke gale mil-mil ke be-tābāna rote haiñ

tumhārā qad-e-mauzūñ baaġh meñ jab yaad aatā hai

hañsī hai qahqahe haiñ aap haiñ ġhairoñ kī mahfil meñ

tasavvur aap kā do-do pahr mujh ko rulātā hai

maiñ parvāna huuñ dūlhā jis ke roye shama' raushan kā

vahī mahfil meñ apnī rāt-bhar mujh ko jalātā hai

falak nairangiyan hum KHaksaron ko dikhata hai

tamanna kah rahi hai yar se nahaq chhuData hai

zaban se kuchh shikayat ho to lutf-e-'ishq jata hai

agar zabt-e-fughan kije kaleja munh ko aata hai

kisi mahbub ki zulf-e-musalsal ko na dekhenge

hamara dil qasam is par tumhaare sar ki khata hai

meri fariyaad sun kar chaunk uTTha yar sote se

kaha dekho ye diwana yahan kyun ghul machata hai

sanobar ke gale mil-mil ke be-tabana rote hain

tumhaara qad-e-mauzun bagh mein jab yaad aata hai

hansi hai qahqahe hain aap hain ghairon ki mahfil mein

tasawwur aap ka do-do pahr mujh ko rulata hai

main parwana hun dulha jis ke roye shama' raushan ka

wahi mahfil mein apni raat-bhar mujh ko jalata hai