مبتلائے غم دل ناکام ہے

مبتلائے غم دل ناکام ہے

جی کا آنا موت کا پیغام ہے

دل کا لے لینا ہے شیوہ آپ کا

جان دے دینا ہمارا کام ہے

لیتا جا او نامہ بر میری زباں

بس یہی نامہ یہی پیغام ہے

ان کی آنکھوں کو کوئی کہتا نہیں

دل ہمارا مفت میں بدنام ہے

اس کے کوچہ میں پڑا ہوں تھک کے میں

آگے اے تقدیر تیرا کام ہے

ایک ظالم کا تصور ہے مجھے

کیا خبر ہے صبح ہے یا شام ہے

وہ جدھر منہ کر کے سوئے رات بھر

دن ادھر کو اور ادھر کو شام ہے