شراب عشق سے مخمور ہیں ہم

شراب عشق سے مخمور ہیں ہم

تمہارے رند ہی مشہور ہیں ہم

روایات کہن ہیں ہم سے زندہ

بہر عہد نوی منصور ہیں ہم

ہمارے دم سے تزئین جہاں ہے

ازل سے آج تک دستور ہیں ہم

خدا رکھے یہ اعجاز تصور

قریب جلوہ گاہ طور ہیں ہم

ضیا پائی ہے ذروں نے ہمیں سے

تمہارے نور سے معمور ہیں ہم

ہمارا دل ہے جلووں سے مزین

کہ شیدائے رخ پر نور ہیں ہم

ہمیں ہے ناز اپنی میکشی پر

عجب انداز کے مخمور ہیں ہم

کھلیں اصرار پنہاں کیسے ہم پر

نظر سے اپنی جب مستور ہیں ہم

اسی کا نام ہے راز مشیت

کہ مختاری پہ بھی مجبور ہیں ہم

بھروسہ ہے ہمیں رحمت پہ صادقؔ

گنہگار جہاں مشہور ہیں ہم