ساقیا کس دھوم سے جاری ہے مے خانہ ترا

ساقیا کس دھوم سے جاری ہے مے خانہ ترا

ہو گئی ہستی فنا پیتے ہی پیمانہ ترا

دولت کونین مجھ کو مل گئی جب تو ملا

جز ترے کچھ بھی نہیں چاہتا ہے دیوانہ ترا

زاہد ہشیار کو اپنی خبر اب تک نہیں

دونوں عالم کی خبر رکھتا ہے مستانہ ترا

تیری نظروں نے مجھے ساقی نوازا اس طرح

بن گیا دل مے کدہ یا خاص کاشانہ ترا

ہے یہی ہر دم نشہ صفدرؔ حسیں کے واسطے

ہر گھڑی ہو سامنے رخ بے حجابانہ ترا