مشتاق ہوا جب سے یہ دیوانہ تمہارا

مشتاق ہوا جب سے یہ دیوانہ تمہارا

جامہ میں سماتا نہیں مستانہ تمہارا

سکتہ میں پڑا ہے کوئی حیرت ہے کسی بے

اللہ رے یہ جلوۂ جانانہ تمہارا

جام مئے توحید عنایت ہو ہمیں بھی

ساقی رہے آباد یہ مے خانہ تمہارا

معبود تمہیں ہر جگہ مطلوب تمہیں ہو

مسجد بھی تمہاری ہے یہ بت خانہ تمہارا

ہر دل میں تمہیں رہتے ہو ہر جا پہ تمہیں ہو

کعبہ ہی نہیں صرف جلوہ خانہ تمہارا

ہر شخص محبت میں تمہاری ہی پھنسا ہے

موسیٰ ہی نہیں والہ و دیوانہ تمہارا

پھر بھی ہے تغافل تمہیں احسنؔ سے صد افسوس

شیدا وہ تمہارا ہے وہ دیوانہ تمہارا