وہ اچھوتا جام دے اے مرشد مے خانہ آج

وہ اچھوتا جام دے اے مرشد مے خانہ آج

دل کو روشن ہو مقام کعبہ و بت خانہ آج

اتنی رفعت بخش دے اے لغزش مستانہ آج

اڑ کے کوئے یار تک پہنچے مرا افسانہ آج

اس ادا سے چل رہا ہے بزم میں پیمانہ آج

اپنی ہستی سے ہوا جاتا ہوں میں بیگانہ آج

آبرو رکھ لے خدایا تو مذاق دید کی

پھر نظر آنے کو ہے عکس رخ جانانہ آج

خود برائے امتحاں محفل میں وہ ہیں جلوہ گر

راس آئے کاش میرا جذبۂ مستانہ آج

اس کرم پر جان صدقے اس کرم پر دل نثار

ہو رہی ہے بزم میں پھر پرسش دیوانہ آج

اے خوشا قسمت یہ مژدہ ہے کسی کی دید کا

جھک رہی ہے خود جبین شوق بے تابانہ آج

یہ جبین عجز میری اور ان کا پائے ناز

دیدنی ہے منظر دید رخ جانانہ آج

رنگ لانے کو ہے اے منظورؔ نسبت یار کی

کھنچ رہی ہے دل کی دنیا خود سوئے کاشانہ آج