کرم پیر مغاں عام ہے مے خانے میں

کرم پیر مغاں عام ہے مے خانے میں

دو جہاں ایک چھلکتے ہوئے پیمانے میں

کل جو میں کہتا تھا ساقی ترے مے خانے میں

اک وہی لفظ ہے منصور کے افسانے میں

ہوش میں بھی نہیں اور ہوش سے باہر بھی نہیں

کون سی بات ہے آخر ترے دیوانے میں

ہستی دہر ہے موقوف مری ہستی پر

سو قیامت ہیں نہاں اک مرے مٹ جانے میں

ذوق تکمیل ہے غالب غم بربادی پر

ایک لطف آتا ہے بن بن کے بگڑ جانے میں

نہیں اصنام تو کیا رہ گیا کعبے میں ذہینؔ

ہم تو کعبے کو اٹھا لائے صنم خانے میں