بنامِ نامی حضرت جی میر سید علی ابوالعلائی غمگینؔ دہلوی

میرے دل میں تیری قدم بوسی کی تمنا کے سبب اک شور بپا ہے، تیرے اشتیاق نے میرے ذوق ادب کو کیسا نکھار دیا ہے۔

مرکز راستاں کے قدموں میں جان نچھاور کرنے کے خیال کو اپنے دل میں گزارتا ہوں اور اگر گستاخی نہ ہو تو کعبۂ رہرواں کے سر کے گرد طواف کرنے کی آرزو رکھتا ہوں، اگر ادب اجازت دے تو دل آویز خطوط کا ورود اور نکتہ ہائے الفت انگیز کی سماعت جو مجھے میری خوش قسمتی کی امید دلاتا ہے مجھے ہزار بار مبارک ہو، چوں کہ آپ نے مجھے اپنے دیدہ و دل میں جگہ دی ہے تو اب بلند میلانی کے سبب اگر میرا سر آسمان سے جا لگے تو بجا ہے اور اگر خود نمائی کے باعث مجھے اپنے سوا کوئی دوسرا نظر نہ آئے تو جائز ہے، طالع یار خان صاحب نے اس دریائے کرم کی عنایتوں کے شمار سے مجھے خود سے بے خود اور میری ارادت میں بے حد و حساب اضافہ کر دیا ہے، بھلا میں اس التفات کے لائق کہاں ہوں اورں کی میں بھلا میرا کیا مرتبہ کہ کوئی میری تعریف کرے اور میرے دیدار کا تمنائی ہو اور وہ بھی ایسا بلند مربتہ اور گراں مایہ شخص کہ جس کو جوہر سات سمندروں کی آبرو ہو اور جس کا خمیر آٹھ گلشنوں کا رنگ و بو شبلی ماسوا سے اپنے انقطاع نظر کے باوجود عبادت خانے میں اس کے قدموں کی تمنا میں چشم براہ ہے اور منصور اس سارے زمزمۂ انالحق کے ہنگامے کے با وصف اس کی بات چیت کی آرزو میں گوش بر آواز ہے، سبحان اللہ وہ ذات کہ تجلیٔ طور بھی جس کے حسن کی شمع پر پروانگی کے لائق ہو مجھ سے ارنی کہہ رہا ہے اور وہ شخص کہ ہر نظر جس کے دیدار کی تاب نہیں رکھتی مجھ سے طلب گار دیدار ہے، کیا کروں ایک عمر سے میری توانائی ایک معاملے میں الجھی ہوئی ہے اور مقصد کے شوق کی شدت نے میری پیراہن میں چنگاری ڈال دی ہے اور وہ کام بہت نازک اور وہ مقصد بہت مشکل ہے کہ اس سے پہلے چند سال دہلی ریزیڈنٹی کے محکمے میں ایک کشاکش کی حالت میں رہا اور ایک طویل عرصے تک فرمان دہان کلکتہ کی عدالت میں پیچ و تاب کھاتا رہا اور اب دو سال ہوئے ہیں کہ وہ مقدمہ دیار لندن میں گیا ہے اور اس عدالت میں زیر غور ہے، جب تک اس ملک سے کوئی جواب اور اس عدالت سے کوئی حکم نہیں آ جاتا میں اپنی جگہ سے حرکت نہیں کر سکتا اور دہلی سے باہر نہیں جا سکتا، اگر چاہوں کہ اس مقدمہ کی کچھ حقیقت بیان کروں تو طوالت کے سبب ایک طرف کہنے والا رشتہ سخن ہاتھ سے کھو بیٹھے گا تو دوسری طرف گوہر راز سننے والے کے ہاتھ بھی نہ آئے گا، غرضیکہ آنکھ منتظر ہے اور دل مجتمع چنانچہ اس کشمکش میں کہ جس نے میرے ظاہر و باطن کو درہم و برہم کر رکھا ہے، سفر نہیں کر سکتا لیکن اتنا سمجھتا ہوں کہ انتظار کا وقت ختم ہو چکا ہے اور کشودِ کار کی گھڑی آپہنچی ہے، اب خیال یہ ہے اور سوچ یہ رہا ہوں کہ جب ولایت سے اس عداوت کو ختم کر دینے والا حکم پہنچ جائے تو بجز اتنے وقت کے کہ سفر کی ضروریات کی انجام دہی میں لگے مزید دہلی میں نہ ٹھہروں اور عازمِ گوالیار ہو جاؤں اور جہاں راہرو پاؤں سے چلتے ہیں، میں سر کے بل چلوں، امید کرتا ہوں کہ جناب عالی کے دسترخوانِ فیض کے پرورش یافتوں اور ریزہ برداروں کو یہ حکم دے دیا جائے گا کہ خاص خاص اوقات میں مجھے اور میری مشکل کو تصور میں لا کر اس طرف توجہ دیں کہ جلد ہی میرا کام روا ہو جائے اور میری مراد پوری ہو تاکہ میرے پائے راہ پیما کو اپنی چال میں کشادگی ملے اور گوالیار کا راستہ میری رہ گذر بن جائے۔

واضح ہو کہ طالع یار خاں کے پہنچنے کے تین دن بعد وہ حکم نامہ کہ جس میں رنگ وبے رنگی کی بحت کی تحریر کے علاوہ کچھ نہیں تھا، ڈاک کے ذریعے مجھے ملا، اس کو میں نے بازوئے ہمت کا تعویذ بنا لیا ہے اور اس طرح امید وار ہوں کہ اس خط کے پہنچنے سے چند دن پہلے سید امانت علی صاحب پہنچ کر میرا آداب نیازِ آپ کے معرضِ ایجاب میں اور فارسی کی غزلیں پیش گاہِ التفات میں پہنچا چکے ہوں گے، ان ہی دنوں میں عنایت کرنے والے جناب میجر جان جاکوب صاحب بہادر نے مجھے دو خط تعمیرِ دولت خانہ کی تاریخ کی طلب کے لیے ارسال کئے ہیں، ان دونوں خطوں کے جواب میں لکھا گیا ورق کہ قطعۂ تاریخ پر مشتمل ہے معذرت نامہ سے منسلک کر کے ارسال کیا جا رہا ہے اور چوں کہ لفافہ بند نہیں کیا گیا ہے، پڑھا جا سکتا ہے اور مکتوب الیہ کو پہنچایا جا سکتا ہے، مکرمی و مطاعی جناب حکیم رضی الدین خاں صاحب کہ مجھ پر لطف و عنایت کرتے ہیں اور اس غمزدگی میں ان کا دیدار ہی میری شادمانی ہے سلامِ نیاز کہہ رہے ہیں اور میری طرح طالب دیدار ہیں۔