انیس الارواح مجلس (۱۲)

سلام کہنے کے بارے میں گفتگو شروع ہوئی تو آپ نے زبان مبارک سے فرمایا کہ رسول اللہ سے حدیث میں آیا ہے کہ جب مجلس سے اٹھے تو سلام کہے کیونکہ سلام کہنا گناہوں کا کفارہ ہے، فرشتے اس کے لئے بخشش کے خواست گار ہوتے ہیں، جو شخص مجلس سے اٹھتے وقت سلام کہتا ہے تو خداوند تعالیٰ کی رحمت اس پر نازل ہوتی ہے اور اس کی نیکیاں اور زندگی زیادہ ہوتی ہے۔

پھر فرمایا کہ میں نے خواجہ یوسف حسن چشتی کی زبانی سنا ہے کہ جب کوئی شخص مجلس سے اٹھتا ہے اور سلام کہتا ہے تو اسے ہزار نیکیاں ملتی ہیں اور اس کی ہزار حاجتیں روا ہوتی ہیں، وہ گناہوں سے ایسا پاک ہوجاتا ہے گویا کہ ماں کے شکم سے نکلاہے، اس کے ایک سال کے گناہ بخشتے ہیں اور ایک سال کی عبادت اس کے اعمال نامے میں درج کرتے ہیں اور سو حج اور عمرہ اس کے نام لکھتے ہیں اور رحمت کے سو تھال اس بندے کے سر پر قربان کرتے ہیں۔

پھر فرمایا کہ امیرالمؤمنین حضرت علی نے فرمایا کہ میں نے چاہا کہ کوئی ایسا موقع ملے کہ رسول اللہ کی مجلس میں تشریف لانے کے وقت یا تشریف لے جانے کے وقت میں سلام کہوں لیکن موقع نہ ملا، جب کبھی میں نے سلام کرنا چاہا تو رسول اللہ پہلے ہی سلام کہتے، کہتے ہیں کہ سلام کرنا نبیوں کی سنت ہے، تمام پیغمبر جو گزرے ہیں سب سے پہلے سلام کہا کرتے تھے۔

جونہی خواجہ صاحب نے ان فوائد کو ختم کیا آپ یاد الٰہی میں مشغول ہوگئے اور خلقت اور دعا گو واپس چلے آئے۔

الحمداللہ علیٰ ذلک