یہ خوشبو یہ چادر یہ پھولوں کی ڈالی نگاہوں کو ان پے جمائے ہوئے ہیں

یہ خوشبو یہ چادر یہ پھولوں کی ڈالی نگاہوں کو ان پے جمائے ہوئے ہیں

علی کے دلارے کی محفل سجی ہے مدینے سے آقا بھی آئے ہوئے ہیں

تمنا لیے دید کی بیٹھے ہیں ہم تم آؤ تو نکلے یہ حسرت ہماری

چلے آؤ وارث چلے آؤ پیارے نگاہوں کو رہ میں بچھائے ہوئے ہیں

رسولِ خدا آئے ہیں ساتھ ان کے علی بھی حسن بھی حسین آئے دیکھو

ہے کتنی ہنسی رات آئی ہوئی یہ زمیں آسماں جگمگائے ہوئے ہیں

دیارِ ولی ہے یہاں کیا کمی ہے عطا پنجتن کا ہو صدقہ سبھی کو

لیے خالی کاسہ بڑی دور سے یہ سبھی تیری محفل میں آئے ہوئے ہیں

یہ وارث کے رحمت کے پیارے کا در ہے یہ مولیٰ علی کے دلارے کا در ہے

یہاں تاجور بھی گداؤں میں مِل کر ذرا دیکھو دامن بچھائے ہوئے ہیں

بڑوں کا ہے دربار عامرؔ سنبھل کر کہیں کوئی لغزش نہ ہو جائے تم سے

بشر تو بشر ہیں یہاں دیکھیے تو فرشتے بھی سر کو جھکائے ہوئے ہیں