نماز_عشق میں نے بارہا دل میں ادا کی ہے

نماز عشق میں نے بارہا دل میں ادا کی ہے

خدا نے عارفوں کو یہ سعادت بھی عطا کی ہے

جو راہ حق میں مرتے ہیں انہیں مردہ نہیں کہتے

یہی تعریف قرآں میں لکھی ان اولیا کی ہے

جو بندوں میں یہ شامل ہیں تو حق سے بھی یہ واصل ہیں

سنو پہچان مشکل آج بھی ان اولیا کی ہے

میسر اولیا کو اپنی قبروں میں ہر اک شئے ہے

نوازش اور عنایت خاص ان پر کبریا کی ہے

جو ٹپکے آنکھ سے آنسو تو دھل جائیں مرے عصیاں

خدا سے بارہا میں نے یہی اک التجا کی ہے

ہے جاری قبر سے جس کی ہمیشہ فیض روحانی

یہ عرس پاک کی محفل اسی حق آشنا کی ہے

بدل دیتے ہیں تقدیروں کو یہ اپی نگاہوں سے

دلوں پر آج بھی جاری حکومت اولیا کی ہے

اگر تم دیکھنا چاہو تو دیکھو دل کی آنکھوں سے

مزار پیر محی الدین پر رحمت خدا کی ہے

محی الدین کے در پر ہے عارف بھی ہوا حاضر

سعادت کیا خدا نے آج مجھ کو یہ عطا کی ہے