سخنور ہے وہی جو بزم میں ہے مدح_خواں تیرا

سخنور ہے وہی جو بزم میں ہے مدح خواں تیرا

وہی اہل زباں ہے نام لے جس کی زباں تیرا

وہی ہے آنکھ ہو جس آنکھ میں جلوہ عیاں تیرا

وہی اچھا ہے دل جس دل میں ہے درد نہاں تیرا

تیرا سودا نہ ہو جس سر میں وہ سر کیا ہے پتھر ہے

طبیعت کیا ہے وہ جس میں نہیں وہم و گماں تیرا

تیرے فیض کرم سے کوئی خالی ہاتھ کیوں جائے

در رحمت ہے در تیرا مکاں جنت نشاں تیرا

تیرا نام مبارک کیوں بھلا مخفی ہو خلقت سے

عیاں عالم میں تو پیران کلیئر میں نشاں تیرا

کوئی ایسی ہو شب ہو خواب میں دیدار یا صابر

خدا وہ دن کرے آنکھوں سے دیکھوں آستاں تیرا

ادھر بھی اک نظر ہو المدد یا حضرت صابر

تیرے در کے سوا جائے بھلا سائل کہاں تیرا

میں پڑھتا ہوں غزل جس دم ندا آتی ہے مرقد سے

پسند آیا ہے ناطقؔ بس ہمیں طرز بیاں تیرا