میرے مرشد میرے آقا حضرت_شاہ_حسن

میرے مرشد میرے آقا حضرت شاہ حسن

تھے حقیقت میں سراپا زینت صد انجمن

اس طرح پھبتے تھے خود اپنے غلاموں میں حضور

چاند جیسے ساتھ میں تاروں کے ہو جلوہ فگن

آپ تھے روح رضا و جان شاہ بوالعلا

آپ تھے عین عنایت شاہ قطب ذوالمنن

تھے جہانگیری گلستاں کے شگفتہ آپ گل

جن کی خوشبو سے معطر ہو گیا سارا چمن

شخصیت حضرت کی کچھ عالم میں پوشیدہ نہیں

آپ ہیں مشہور مثل مشک آہوئے ختن

میرے آقا آپ کی اللہ رے روحانیت

شرق سے تا غرب ہیں با فیض سارے مرد و زن

مشکلوں میں آپ کو جب بھی پکارا ہے کبھی

ہو گئیں حل مشکلیں با عرصۂ چشم زدن

اس قدر دوری کہ نظروں سے ہیں پوشیدہ حضور

قربیت اتنی کہ پھر بھی آپ ہیں سایہ فگن

ہے کرم ہم پر کہ اس دوری میں شان قربیت

خانۂ دل میں ہیں عاشقؔ آج بھی جلوہ فگن