جانِ رحمت مرا واسطہ آپ سے

جانِ رحمت مرا واسطہ آپ سے

جو بھی کہنا ہوا کہہ لِیا آپ سے

میری تہذیبِ فکر و نظر آپ ہیں

سوچنا آپ سے دیکھنا آپ سے

میرے ظاہر میں باطن میں عکس آپ کا

چشم و دل آئینہ آئینہ آپ سے

جسم و جاں آپ کی ضو سے معمور ہیں

مجھ میں جشنِ چراغاں ہوا آپ سے

ایک دریا سے نکلی ہیں سب ندیاں

انبیا آپ سے اؤلیا آپ سے

آپ سے بند لفظوں کے معنی کھلے

گل ہے گل اور ہوا ہے ہوا آپ سے

آپ کی رفعتوں کا یہ احسان ہے

پست انسان کا قد بڑھا آپ سے

مسندِ گل پہ تشریف فرما ہوئے

خار و خس کو یہ رتبہ ملا آپ سے

لب پہ لرزاں ہو یا دل میں ترساں رہے

عرض گستر ہے حرفِ ثنا آپ سے