مجھ خطا_کار سا انسان مدینے میں رہے

مجھ خطا کار سا انسان مدینے میں رہے

بن کے سرکار کا مہمان مدینے میں رہے

یاد آتی ہے مجھے اہل مدینہ کی یہ بات

زندہ رہنا ہو تو انسان مدینے میں رہے

اللہ اللہ سرافرازئی صحرائے حجاز

ساری دنیا کا سلطان مدینے میں رہے

دور رہ کر بھی اٹھاتا ہوں حضوری کے مزے

میں یہاں اور مری جان مدینے میں رہے

یوں ادا کرتے ہیں عشاق محبت کی نماز

سجدہ کعبے میں ہو اور دھیان مدینے میں رہے

ان کی شفقت غم کونین بھلا دیتی ہے

جتنے دن آپ کا مہمان مدینے میں رہے

چھوڑ آیا ہوں دل و جان یہ کہہ کر اعظمؔ

آ رہا ہوں مرا سامان مدینے میں رہے