اب جنون_عشق_احمد پھر دوبارا ہو گیا

اب جنون عشق احمد پھر دوبارا ہو گیا

آج سے صحرائے طیبہ گر ہمارا ہو گیا

اس قدر بھاتا ہے حضرت آپ کا صحرا مجھے

خار آنکھوں میں مری گلزار سارا ہو گیا

دیکھ کر حالت کو میری اب مجھے کہتے ہیں لوگ

اپنے بیگانہ سے سب سے یہ کنارا ہو گیا

رات کو سوتا ہوں منہ کر کے مدینہ کی طرف

جب سے دیدار محمدؐ کا نظارا ہو گیا

باغ رضواں کی ہوس مجھ کو نہیں ہے واعظ

کوچہ احمد میں اب میرا گزارا ہو گیا

جا کے یوں روضہ مبارک پر کہوں گا یا نبی

فکر سے آفت سے غم سے میں کنارا ہو گیا

دیکھیے مدح نبیؐ میں لکھ رہا ہوں یہ غزل

بخت کا میرے ہر اک ذرہ ستارا ہو گیا

روئے احمد کے تصور میں یہی کہتے ہیں ہیں

محو دیدار محمدؐ دل ہمارا ہو گیا

چاند ادنیٰ معجزہ ہے آپ کا میرے نبی

کیسا انگشت شہادت سے دو پارہ ہو گیا