در_مرشد سے دل کے تار جب ٹکرانے لگتے ہیں

در مرشد سے دل کے تار جب ٹکرانے لگتے ہیں

تصور میں زیارت کے مزے ہم پانے لگتے ہیں

قدم بوسی کو جھک جاتی ہیں نظریں خود بخود میری

مقدس نقش پائے غوث جب یاد آنے لگتے ہیں

بلاوا آئے گا اک دن نہ ہو مایوس تو اے دل

یہی کہہ کہہ کے اپنے دل کو ہم بہلانے لگتے ہیں

مچل اٹھتا ہے دل بے ساختہ میرا بھی جانے کو

سوئے بغداد جب عاشق تمہارے جانے لگتے ہیں

وسیلہ پنجتن کا جب بھی دیتا ہوں دعاؤں میں

ہمارے گھر میں خوشیوں کے خزانے آنے لگتے ہیں

محبت سے عقیدت سے شہ طیبہ کی نسبت سے

جو دل آتے ہیں در پہ غوث کے نذرانے لگتے ہیں

خیال آتے ہی دل میں روضۂ سرکار کا دانشؔ

نگاہوں میں امیدوں کے ثمر لہرانے لگتے ہیں