کبھی دھرتی سے جاتا ہے کبھی امبر سے جاتا ہے

کبھی دھرتی سے جاتا ہے کبھی امبر سے جاتا ہے

پیام حق زمانے میں ہر اک منظر سے جاتا ہے

فلک پر جگمگاتے ہیں جو سورج چاند اور تارے

اجالا درمیاں ان کے رخ انور سے جاتا ہے

سنور جاتے ہیں دونوں چاہے دنیا ہو کہ عقبیٰ ہو

سلیقہ دین کا جب روح کے اندر سے جاتا ہے

کیا کرتا ہے استقبال رضواں ایسے مومن کا

اجازت لے کے جو بھی شافع محشر سے جاتا ہے

سلامی کے لیے آتے ہیں اس کی حور و غلماں سب

شخص جگمگا کر جو نبی کے در سے جاتا ہے

یہ ثابت ہو گیا معراج کی شب عرش اعظم پر

خدا کے گھر کا رستہ مصطفیٰ کے گھر سے جاتا ہے

کوئی مشکل نہیں آتی پھر اس کی راہ میں دانشؔ

ہمیشہ پڑھ کے چاروں قل جو اپنے گھر سے جاتا ہے