رحمتوں والے نبی خیر_الوریٰ کا تذکرہ

رحمتوں والے نبی خیر الوریٰ کا تذکرہ

کیجیے ہر وقت محبوب خدا کا تذکرہ

مشکلیں آئیں تو آئیں پاس میرے کس طرح

میرے لب پر ہے مرے مشکل کشا کا تذکرہ

بھیجتا ہوں میں درودوں کی سجا کر ڈالیاں

روز ہوتا ہے مرے گھر مصطفیٰ کا تذکرہ

میرے دل کے گوشے گوشے میں اجالا ہو گیا

کر رہا تھا میں ابھی شمس الضحیٰ کا تذکرہ

کوئی گر چاہے کہ ہو مجھ پر فزوں فضل خدا

وہ کرے ہر دم حبیب کبریا کا تذکرہ

کون ہے جس کے نہیں کشکول میں داتا کی بھیک

ہو رہا ہے ہر جگہ تیری سخا کا تذکرہ

رحمتوں کے پھول برسے صبح تک گھر میں مرے

رات بھر ہوتا رہا ان کی عطا کا تذکرہ

کھل اٹھے گلشن امیدوں کے ہوا دل باغ باغ

جب کیا میں نے مدینے کی ہوا کا تذکرہ

نعت سن کر ہو نہ برہم بے خبر قرآن پڑھ

خود خدا کرتا ہے اپنے مصطفیٰ کا تذکرہ

پھر نیازیؔ کی بھی ہو جائے مدینے حاضری

دوستو کرنا نبی سے یوں محمدؐ کا تذکرہ