گھٹائیں چھا گئیں دنیا پہ رحمت جوش میں آئی

گھٹائیں چھا گئیں دنیا پہ رحمت جوش میں آئی

کسی کی زلف مشکیں دوش سیمیں پر جو لہرائی

کہاں تک صبر کب تک ضبط کس حد تک شکیبائی

حسینوں کو جھکا لے گا ترا انداز رعنائی

زمانہ کہتا ہے مجھ کو یہ سودائی ہے سودائی

مرا عالم یہ کیا جانے مجھے بھائی ہے رسوائی

تمہیں احمد تمہیں محمود تم ہی شافع محشر

تمہارے در پہ کرتے ہیں فرشتے بھی جبیں سائی

زمانہ ہو گیا پر نور گلشن جگمگا اٹھا

گھٹا رحمت کی اٹھی اور ایسی جھوم کر آئی

سیاہی مٹ گئی دنیا کی کعبہ اب بنا قبلہ

جوں ہی تشریف لائے آپ ہر شئے پر بہار آئی

تن اسلام میں پھونکی تھی تم نے روح جاں پرور

اسی سے آج تک باقی ہے یہ تاب و توانائی

تغافل ہے تساہل ہے کہ میری تیرہ بختی ہے

ازل سے ہے جبین عشق سر مست جبیں سائی

تمہارا ہی رہوں گا میں تمہارا ہوں ہمیشہ سے

تمہاری ہی خدائی دونوں عالم میں نظر آئی

مزا جب ہے کہ محشر میں کہیں خود شافع محشر

رؤف بے نوا کی آج کیسی بات بن آئی