صبا مدینے میں لے چل کسی بہانے سے

صبا مدینے میں لے چل کسی بہانے سے

ہماری خاک تو لگ جائے گی ٹھکانے سے

یہ عزم لے کے چلا ہوں غریب خانے سے

جھکاؤں سر کو اٹھاؤں نہ آستانے سے

تمہارے فضل و کرم کی پناہ میں آکر

قدم قدم پہ میں ٹکرا گیا زمانے سے

ہزار پیچ و خم کربلا سے گزرا ہوں

یزید بن کے جو اٹھا کوئی زمانے سے

ہر ایک افسانے کے عنوان بن گئے ہیں وہ

انہی کی بات نکلتی ہے ہر فسانے سے

حسین ابن علی نے بتا دیا ہم کو

فروغ ملتا ہے امت کو سر کٹانے سے

اسے تو اہل محبت ہی جانتے ہیں وفاؔ

ہمارے سر کو جو نسبت ہے آستانے سے