اگر چاہو خدا کی رحمتوں سے واسطہ رکھنا

اگر چاہو خدا کی رحمتوں سے واسطہ رکھنا

تو ہر لمحہ لبوں پر اپنے ذکر مصطفیٰؐ رکھنا

بروز حشر بخشش کے لیے اتنا ضروری ہے

درود پاک ہونٹوں پر سدا اپنے سجا رکھنا

میں ایسی بے خودی کو ہوش سے بہتر سمجھتا ہوں

کہ یاد مصطفیٰؐ میں دونوں عالم کو بھلا رکھنا

میں دیوانہ تمہارا خود کو کہتا ہوں زمانے میں

خیال اس بے ادب کا بھی قیامت میں ذرا رکھنا

وہ جن کے عشق میں مرنا بھی سو جینے کا جینا ہے

انہی کے عشق میں تم اپنی ہستی کو فنا رکھنا

شرف حاصل ہے مجھ کو ان کے روضے کی حضوری کا

امید گلشن فردوس دل میں دردؔ کیا رکھنا