احد خود احمدؐ کی شکل بن کر جو اپنی صورت کو تک رہا ہے

احد خود احمدؐ کی شکل بن کر جو اپنی صورت کو تک رہا ہے

ہمیشہ ذات خدا کے آگے وجود بندہ کا آئینہ ہے

صفات و اسما ذات مطلق کی جامعیت ہے شان اس کی

جو من رآنی سنا رہا ہے کلام اس کا خدا‌ نما ہے

ہے ابد رب کی جو ایک ہستی ظہور اس میں ہے بے چگوں کا

خودی سے اپنی نکل کے دیکھو خدا سے بندہ کہاں جدا ہے

فنا محمدؐ میں ہو کے دیکھو ظہور حق ہے حقیقت اس کی

نہیں ہے وحدت میں کچھ دوئی اب وجود عالم میں ایک کا ہے

ہوئی ہے اثبات ذات اللہ تو نفی اپنی یہ کہتی ہے خود

جہاں ہے سارا خدا کا جلوہ کہاں ظہور اپنا ماسوا ہے

خدا کا ہر دم معائنہ ہے تعین اپنا نظر کرو تم

نہ لا تعین میں دید ہے کچھ وہاں پہ بیچوں و بیچرا ہے

پڑا جب آنکھوں میں عکس حق کا بنے ہیں دیدے مرے مرقع

نظر کرو میری پتلیوں میں خدا کا چہرا سما گیا ہے

سخن حقایق کے کیوں نہ نکلیں زبان کو ہر فشاں سے اس کی

معین دین نے ہی اپنے عاشقؔ کو اس کا گویا بنا دیا ہے