نبی جتنے قریب عرش_اعظم ہوتے جاتے ہیں

نبی جتنے قریب عرش اعظم ہوتے جاتے ہیں

ذریعے بخشش امت کے محکم ہوتے جاتے ہیں

مسرت بڑھتی جاتی ہے الم کم ہوتے جاتے ہیں

قریب خلد طیبہ غالباً ہم ہوتے جاتے ہیں

یہ کس نے ساز چھیڑا دہر میں وحدت پرستی کا

ترانے شرک کی باتوں کے مدھم ہوتے جاتے ہیں

جو ٹھکرائے ہوئے تھے دہر کے وہ تیری محفل میں

مکرم بنتے جاتے ہیں معظم ہوتے جاتے ہیں

اندھیرا ہے کہ چھٹتا جا رہا ہے خود شب اسریٰ

دو عالم ہیں کہ انوار مجسم ہوتے جاتے ہیں

حرا میں ابرؔ فاقہ ہے ورم ہے پائے اقدس پر

مگر آقا کے سجدے ہیں کہ پیہم ہوتے جاتے ہیں