اے صنم تجھ پہ ہیں قرباں گل_و_آئینہ_و_شمع

اے صنم تجھ پہ ہیں قرباں گل و آئینہ و شمع

ہیں ترے رخ سے پشیماں گل و آئینہ و شمع

دیکھ خنداں بھی ہیں حیراں بھی ہیں گریاں بھی ہیں

دیکھ کر صورت جاناں گل و آئینہ و شمع

بلبل و طوطی و پروانہ نہیں چاہتے ہیں

تیرے ہوتے ہوئے اے جاں گل و آئینہ و شمع

عشق میں تیرے ہوئے جامہ سے باہر ایسے

کہ پھرا کرتے ہیں عریاں گل و آئینہ و شمع

رنگ اور نور صفا لائے ہیں تیرے گھر سے

ہیں ترے بندۂ احساں گل و آئینہ و شمع

صاف کہتا ہوں کہو کس کے قلم سے نکلا

اس طرح دست و گریباں گل و آئینہ و شمع

میری کلک و غزل و صفحۂ دیواں کو شہیدؔ

کہتے ہیں سارے سخنداں گل و آئینہ و شمع