غم نہ تھا عصیاں کا کیسا ہی یم_ذخار تھا

غم نہ تھا عصیاں کا کیسا ہی یم ذخار تھا

احمد مرسل میری کشتی کا کھیونہار تھا

کیا بڑی سرکار تھی اور کیا بڑا دربار تھا

جس کا ناظر حق اور جبریل خدمت گار تھا

یوں کہوں گا جا کے محبوب خدا تیرا خیال

تیری فرقت میں مرا ہمدم تھا اور غمخوار تھا

میری آنکھیں ہوتیں آغوش حلیمہ یا نبی

میرا دل ہوتا جو تیری سیر کا گلزار تھا

بے طلب اللہ نے کیا کیا دیا معراج میں

طالع بیدار خواب احمد مختار تھا

تھا وہ محبوب خدا اور سب تھے عاشق اس لیے

سب رسولوں کا محمدؐ مصطفیٰ سردار تھا

چاند سا چہرا اترا اللہ کو آیا پسند

اے عرب کے نوجواں یوں تجھ پہ اتنا پیار تھا

آ کے ٹکرایا ہے عصیاں کے جزیروں میں جہاز

میرے مولیٰ تیری اک ٹھوکر سے بیڑا پار تھا

اکبرؔ شیدا اسے جنت ملی بخشا گیا

جو کہ مداح حبیب ایزد غفار تھا