لب کوثر ہے میلہ تشنہ کامانِ محبت کا

لب کوثر ہے میلہ تشنہ کامانِ محبت کا

وہ ابلا دستِ ساقی سے وہ ابلا چشمہ شربت کا

یہ عالم انبیا پر ان کے سرور کی عنایت کا

جسے دیکھو لیے جاتا ہے پروانہ شفاعت کا

پلا دے اپنی نظروں سے چھلکتا جام رویت کا

شہ کوثر ترحم تشنہ جاتا ہے زیارت کا

وہی جو رحمۃ للعالمیں ہیں جانِ عالم ہیں

بڑا بھائی کہے ان کو کوئی اندھا بصیرت کا

مہ و خورشید و انجم میں چمک اپنی نہیں کچھ بھی

اجالا ہے حقیقت میں انہیں کی پاک طلعت کا

بھٹکتا یوں پھرے کب تک تمہارا اخترؔ خستہ

دکھا دو راستہ اس کو خدارا شہرِ الفت کا