کیا گلشن_یثرب میں مہکتی ہے چمیلی

کیا گلشن یثرب میں مہکتی ہے چمیلی

کس شوق سے ہر پھول کو تکتی ہے چمیلی

کیا وجد میں رحمت کے شجر جھوم رہے ہیں

کیسی صفت شاخ لچکتی ہے چمیلی

ہے لالۂ گلزار کا دل داغ سے داغی

اور نور الہٰی سے چمکتی ہے چمیلی

قمری شجر سرو پہ کرتی ہے ترانے

بلبل تیری ٹہنی پہ چہکتی ہے چمیلی

دیدار دکھا اے گل گلزار الٰہی

بسمل کی طرح غم میں تڑپتی ہے چمیلی

لائی ہے صبا نگہت پیراہن احمد

اور مشک صفت خوب مہکتی ہے چمیلی

نیرنگئے حسن گل گلزار عرب سے

نرگس کی طرح آنکھ جھپکتی ہے چمیلی

کیا سینۂ پر داغ ہے داغ مہ تاباں

کیوں دامن گل شرم سے ڈھکتی ہے چمیلی

مستانۂ چشم شہ انور ہوں جلالیؔ

نرگس کی طرح یوں مجھے تکتی ہے چمیلی