مدینہ جن کا مسکن ہے مکین_لا_مکاں ہیں وہ

مدینہ جن کا مسکن ہے مکین لا مکاں ہیں وہ

خدا ہے رازداں ان کا خدا کے رازداں ہیں وہ

انہیں کے نور سے پر نور دو عالم کی بستی ہے

ظہور عشق ہیں وہ زینت حسن جہاں ہیں وہ

خدا نے خود ہے فرمایا میری ساری خدائی پر

ازل سے مہرباں ٹھہرے ابد تک مہرباں ہیں وہ

خرد بیکار ہے ان کی حقیقت کو سمجھنے سے

کہ بحر بیکراں ہیں وہ نشان بے نشاں ہیں وہ

وہ لا محدود ہیں قید تعین میں نہیں رہتے

بھلا قدسی بھی کیا سمجھیں کہ کیا ہیں وہ کہاں ہیں وہ

پتے کی بات کہتا ہوں سمجھ لو یہ پتہ ان کا

جہاں پر جلوہ گر ہیں وہ وہاں حق کی زباں ہیں وہ

امیرؔ صابری چشم بصیرت سے جو دیکھا تو

یہاں ہیں وہ وہاں ہیں وہ عیاں ہیں وہ نہاں ہیں وہ