عروج_سرور_بطحا تو دیکھو

عروج سرور بطحا تو دیکھو

کہاں بندہ کہاں مولیٰ تو دیکھو

نہ ہوتے آپ تو کچھ بھی نہ ہوتا

عرب کے لعل کا ہونا تو دیکھو

دو عالم کو منور کر گیا ہے

نبی کے حسن کا جلوہ تو دیکھو

تقاضا دید کا کرنے سے پہلے

ذرا تم حوصلہ اپنا تو دیکھو

اگر کچھ دیکھنے کی آرزو ہے

کسی کا ہو کے مر جانا تو دیکھو

جبیں سجدے میں ہے گردن پہ خنجر

نماز عشق کا سجدہ تو دیکھو

کوئی چوتھے فلک پہ رہ گیا ہے

کسی کی منزل اسریٰ تو دیکھو

امیرؔ صابری پر جو کرم ہے

بھرا کوزے میں ہے دریا تو دیکھو