حضرت_مولیٰ علی ہیں راز_دار_فاطمہ

حضرت مولیٰ علی ہیں راز دار فاطمہ

شبر و شبیر دونوں ہیں قرار فاطمہ

اللہ اللہ دین احمد کی حفاظت کے لیے

لٹ رہا ہے دشت میں باغ بہار فاطمہ

فکر جاتی ہے مری سوئے بقیع پاک خود

جب سے دیکھا ہے نگاہوں نے مزار فاطمہ

بے اجازت بلبل سدرہ نہ آتے ان کے گھر

اس قدر رب نے بڑھایا افتخار فاطمہ

ہے قیامت خیز منظر کربلا کی ریت پر

سر بکف موجود ہیں سب جاں نثار فاطمہ

بندگی شب بھر خدا کی احسن تقویم ہے

قابل تحسین ہے ہر شاہکار فاطمہ

ہے تمنا اس کی آنکھوں کو نظامیؔ چوم لوں

جس نے دیکھا ہے زہے قسمت دیار فاطمہ