ہم ہوئے سیراب عشق_مصطفیٰؐ کے جام سے

ہم ہوئے سیراب عشق مصطفیٰؐ کے جام سے

اس لیے وابستگی اپنی ہے خاص و عام سے

دل میں عشق مصطفیٰؐ جس کے ہو لب پر ذکر ہو

آخرت میں کیسے وہ ذاکر نہ ہو آرام سے

وہ ہمیشہ گیت گاتے ہیں جہاں میں آپ کے

یا نبی ہوتے ہیں جو بھی مستفیض اکرام سے

شاعری کا ذوق میرے دل میں پیدا ہو گیا

فکر نے پرواز پائی آپ کے انعام سے

آپ کی فرقت گراں دل کو گزرتی ہے حضورؐ

کس طرح بلبل جدا رہ پائے گل اندام سے

ہم نہ گستاخی سہیں گے مصطفیٰؐ کے نام پر

جان بھی دے دیں گے ہم ڈرتے نہیں انجام سے

تم نے کیا فاراں کی چوٹی سے دیا پیغام حق

قصر باطل اب بھی لرزاں ہے تمہارے نام سے