کیا غم میری مدد پہ اگر غوث پاک ہیں

کیا غم میری مدد پہ اگر غوث پاک ہیں

اللہ بھی ادھر ہے جدھر غوث پاک ہیں

حامی مرے شفیق مرے دادرس مرے

ہیں اس طرف رسول جدھر غوث پاک ہیں

اس نام سے کلیجے میں ٹھنڈک نہ کیوں پڑے

مرہم برائے زخم جگر غوث پاک ہیں

کھٹکا نہیں ہے کچھ مجھے آفات دہر کا

آئے کوئی بلا تو سپر غوث پاک ہیں

کر دیں گے ڈوبتی ہوئی کشتی کو میری پار

باندھے ہوئے مدد پہ کمر غوث پاک ہیں

شمس و قمر سماتے نہیں ہیں نگاہ میں

آنکھوں کو جیسے مد نظر غوث پاک ہیں

دریائے بے کنار ولایت میں آسمان

مثل صدف ہے اس میں گہر غوث پاک ہیں

شرع محمدی کی ہے رونق حضور سے

سرسبز نخلِ دین کے ثمر غوث پاک ہیں

ہے کون جو مطیع نہیں ہے حضور کا

فرماں روائے جن و بشر غوث پاک ہیں

پرواہ نہیں جو کوئی نہیں قدرداں امیرؔ

صد شکر قدرداں ہنر غوث پاک ہیں