اے خالق_و_مالک کون_و_مکاں سبحان_اللہ سبحان_اللہ

اے خالق و مالک کون و مکاں سبحان اللہ سبحان اللہ

تری مدح کروں کس طرح بیاں سبحان اللہ سبحان اللہ

تیرا نور ہے رونق ہر دو جہاں سبحان اللہ سبحان اللہ

ہر شئے میں نہاں ہر شئے سے عیاں سبحان اللہ سبحان اللہ

میں تیرے کرم کے بلہاری میں تیری عنایت کے قرباں

دل کو نہیں فکر سود و زیاں سبحان اللہ سبحان اللہ

اک پل میں نوازش ہوتی ہے دل سے کوئی تیرا نام تو لے

ہر مشکل ہوتی ہے آساں سبحان اللہ سبحان اللہ

دنیا بھی اسی کا پرتو ہے عقبیٰ بھی اسی کا جلوہ ہے

آباد ہیں میرے دونوں جہاں سبحان اللہ سبحان اللہ

عصیاں کے گھور اندھیروں میں میکشؔ کی نجات کا ضامن ہے

ہر سمت ہے جلوۂ بے پایاں سبحان اللہ سبحان اللہ