بہاریں تیری مرغان_چمن تیرے چمن تیرا

بہاریں تیری مرغان چمن تیرے چمن تیرا

گلوں میں بو ہے تیری رنگ تیرا بانکپن تیرا

فلک تیرا زمیں تیری ملک تیرے ہیں ہم تیرے

غرض جو کچھ ہے دنیا میں ہے سب نو و کہن تیرا

نہیں ہے توڑ اس کا جب تو ہم بچ کر نکلتے ہیں

بڑی الجھن کا ہے ہر پیچ زلف پر شکن تیرا

سخن گوئے قیامت یوں کیا ہے تجھ کو خالق نے

کرے گا سب کو زندہ یہ لب اعجاز فن تیرا

کہا کس شے کو تو نے اپنی کوئی بھی نہیں تیری

اسی کی یہ امانت ہے نہ تن تیرا نہ من میرا

لحد میں سونگھ کر اس کو فرشتے مجھ سے کہتے ہیں

ردائے سرور عالم ہے کیا اکبرؔ کفن تیرا